
帝洛巴大師教言集TILO15དཔལ་འཁོར་ལོ་བདེ་མཆོག་གི་རྣམ་པར་སྤྲུལ་པ་དང་། ཡུལ་ཉི་ཤུ་རྩ་བཞིའི་རྒྱུ་མཚན་བཞུགས་སོ། །
1-7-1a

༄༅། །དཔལ་འཁོར་ལོ་བདེ་མཆོག་གི་རྣམ་པར་སྤྲུལ་པ་དང་། ཡུལ་ཉི་ཤུ་རྩ་བཞིའི་རྒྱུ་མཚན་བཞུགས་སོ། །
༄། །ལེའུ་ལྔ་བཅུ་རྩ་གཅིག་པ་ཡི་གེ་འབུམ་པ།
༄༅། །དཔལ་འཁོར་ལོ་བདེ་མཆོག་གི་རྣམ་པར་སྤྲུལ་པ་དང་། ཡུལ་ཉི་ཤུ་རྩ་བཞིའི་རྒྱུ་མཚན་བཞུགས་སོ། །
1-7-1b

༄༅། །དཔལ་འཁོར་ལོ་སྡོམ་པ་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་ཀྱིས། དཔལ་བདེ་མཆོག་ཇི་ལྟར་སྤྲུལ་པའི་ཚུལ་ནི་འདི་ལྟ་སྟེ། འཛམ་བུའི་གླིང་འདིར་བསྐལ་པ་རྫོགས་
ལྡན་གྱི་དུས་སུ། སེམས་ཅན་མི་རྣམས་ལ་ཡོན་ཏན་བཞི་སྟེ། ཚེ་དཔག་ཏུ་མེད་པ་ཐུབ་པ་དང་། ལོངས་སྤྱོད་ལ་བདག་གི་བ་མེད་པ་དང་། ཁ་དོག་རང་ལ་འོད་ཡོད་པ་དང་། རྫུ་འཕྲུལ་ནམ་མཁའ་ལ་འཕུར་ཤེས་
པའི་དུས་སོ། །དེ་ནས་ཚེ་འགྲིབ་པ་ནི་གསུམ་(སུམ་)ལྡན་གྱི་དུས་སོ། །ལོངས་སྤྱོད་འགྲིབ་པ་ནི་གཉིས་ལྡན་གྱི་དུས་སོ། །དེ་ནས་ས་ཞག་ལ་སོགས་བཟོས་པས། ཤི་བ་རྣམས་ལ་རོ་བྱུང་སྟེ། རོ་དེ་དག་བསྐྱལ་བའི་ས་ལ་
དུར་ཁྲོད་ཅེས་པར་གྲགས་ལ། དེ་ཕྱོགས་འཚམས་(མཚམས་)ལ་སོགས་པར་ཆགས་སོ། །དེ་ནས་རྫུ་འཕྲུལ་དང་ཁ་དོག་གཉིས་ཉམས་པ་ནི་བརྩོད་(རྩོད་)ལྡན་གྱིས་དུས་སོ། །དེའི་དུས་པུ་ལ་རི་མ་ལ་ཡ་དང་། ཛཱ་ལན་དྷ་
དང་། ཨུ་རྒྱན་དང་། ཨར་བུ་ཏ་དང་། བཞི་རུ་སུམ་ཅུ་རྩ་གསུམ་གྱིས་ལྷ་འགའ་ཞིག་བབས་ནས་སྤྲུལ་ཞིང་གཞི་བཟུང་བས་དེ་ལ་གནས་ཞེས་བརྟགས་སོ། །དེ་ནས་གོ་ཏ་བ་རི་དང་། རསྨི་ཤྭ་རི་(ཪ་མེཤྭརི་)དང་།
དེ་བི་ཀོ་ཊི་དང་། མ་ལ་ཝ་རུ། དྲི་ཟས་བཟུང་བས་དེ་ལ་ཉེ་བའི་གནས་ཤེས་(ཞེས་)ཟེར་ལ། དེ་དག་ནི་སུམ་ཅུ་རྩ་གསུམ་པ་དང་། དྲི་ཟས་བཟུང་བས་མཁའ་སྤྱོད་ཅེས་གྲགས་སོ། །དེ་ནས་ཀ་(ཀཱ་)མ་རུ་པ་དང་། ཨོ་ཊེ་གཉིས་
1-7-2a

གནོད་སྦྱིན་གྱིས་བཟུང་བ་ལ་ཞིང་དུ་བཏགས་ཞིང་། ཏྲི་ཤ་ཀུ་ནེ་དང་། ཀོ་ས་ལ་གཉིས་གནོད་སྦྱིན་གྱིས་གཡོག་གིས་བཟུང་བས་ཉེ་བའི་ཞིང་ཞེས་སོ། །དེ་ནས་ཀ་ལཾ་ཀ་དང་། ལཾ་བི་ཀ་གཉིས་
སྲིན་པོས་བཟུང་བས། ཙྪན་དྷོ་ཞེས་བཏགས་ལ། ཀཉྩི་དང་། ཧི་མ་(མཱ་)ལ་ཡ་གཉིས་སྲིན་པོའི་གཡོག་གིས་བཟུང་ནས། ཉེ་བའི་ཚན་དྷོ་ཧ་ཞེས་སོ། །དེ་ལྟར་གནོད་སྦྱིན་དང་སྲིན་པོས་བཟུང་བས་ས་
སྤྱོད་ཞེས་གྲགས་སོ། །དེ་ནས་པྲེ་ཏ་པུ་རི་དང་། གྲཱི་བ་དེ་བ་གཉིས་ཀླུས་བཟུང་བས་དེ་ལ་འདུ་བ་ཞེས་བཏགས་ལ། སཽ་རཥྚ་དང་། སུ་ཝན་གྲི་བ་གཉིས་ཀླུའི་གཡོག་གིས་བཟུང་བས། ཉེ་བའི་འདུ་བ་ཅན་ཅེས་(ཞེས་)བྱའོ། །དེ་ནས་རི་རབ་ཀྱི་ཁོང་
གསེང་ནས་ལྷ་མ་ཡིན་བྱུང་ནས། ན་ག་ར་དང་། སིན་དྷུ་གཉིས་བཟུང་བས་དུར་ཁྲོད་ཅེས་ཟེར་ལ། མ་རུ་དང་། ཀུ་ལུ་ཏ་གཉིས་ལྷ་མ་ཡིན་གྱིས་གཡོག་གིས་བཟུང་བས་ཉེ་བའི་དུར་ཁྲོད་ཅེས་སོ། །དེ་ལྟར་ཀླུ་དང་ལྷ་མ་ཡིན་གྱིས་བཟུང་བས་ས་
འོག་ཅེས་གྲགས་སོ། །དེ་ལྟར་དེ་རྣམས་ནི་དྲག་པོ་ཉི་ཤུ་རྩ་བཞིར་གྱུར་ནས། ཟས་སུ་ཤ་ཟ། སྐོམ་དུ་ཁྲག་འཐུང་ལ། འགྲོ། འཆག །ཉལ། འདུག་རྣམས་སུ་སོ་སོ་རང་རེའི་ཆུང་མ་རྣམས་དང་མཁྱུད་(འཁྱུད་)ཅིང་། གོས་སུ་མི་ལྤགས་ལ་སོགས་པ་གྱོན་པ། ལག་
ཏུ་དགྲ་སྟ་དང་། ཏྲི་ཤུ་ལ་སོགས་པ་ཐོགས་ནས་ནི་རང་ཤུའི་རྒྱན་གྱིས་བརྒྱན་སྟེ། དེ་རྣམས་ཀྱིས་འཛམ་བུའི་གླིང་གི་མི་རྣམས་མ་རུངས་པར་བྱས་སོ། །དུས་དེའི་ཚེ་དྲེགས་པ་ཅན་དེ་དག་བགྲོས་པས། ཁོ་བོ་དག་ལ་དཔོན་ཅིག་དགོས་པས་
1-7-2b

དེ་རི་རབ་ཀྱི་སྟེངས་(སྟེང་)མ་ཧཱ་དེ་བ་ཞེས་པ་སྐུ་བཞིའི་བདག་ཉིད་འཕྲིན་ལས་བཞིའི་ངོ་བོ་ཞལ་བཞི་མངའ་བ་སྟེ། དེའང་ཞལ་རེ་རེ་ཞིང་ཡུམ་རེ་རེ་ཡོད་པ། དེ་ལྟར་ཐུན་དང་པོ་ལ། ཤར་ཕྱོགས་སུ་གཽ་རི་དང་སྤྱོད་ལ། ཐུན་གཉིས་པ་ལྷོར་
ཨེ་ཀ་ཛྲ་ཏི་དང་རོལ་ཅིང་། ཐུན་གསུམ་པ་ལ་ཆུང་ཏུ་ཀ་ལ་རོ་ཏྲི་དང་རོལ་ཅིང་། ཐུན་ཐ་མ་ལ་བྱང་དུ་ཨུ་མ་དཱེ་བི་(དེ་བཱི་)དང་མཉམ་པར་གནས་པ་སྟེ། དེ་དག་ནི་ཉེ་བའི་ཡུམ་མོ། །སྦས་པའི་ཡུམ་བཞི་ནི། སྐྲ་ཅན་མ་དང་། ཉེ་བའི་སྐྲ་
ཅན་མ་དང་། མུན་པ་མ་དང་། ཉེ་བའི་མུན་པ་མའོ། །དེ་ལྟ་བུ་དེ་ལ་དཔོན་ཞུས་སོ། །དེ་ལྟར་དཔོན་གཡོག་ཉི་ཤུ་རྩ་ལྔ་པོ་དེས། འཛམ་བུའི་གླིང་གི་སེམས་ཅན་རྣམས་ལ་འཚེ་ཞིང་ཕུང་བར་བྱས་སོ། །དེའི་དུས་ན། ཡང་
དག་པར་རྫོགས་པའི་སངས་རྒྱས་ཀྱིས། དྲེགས་པ་དཔོན་གཡོག་དེ་དག་གིས་འཇིག་རྟེན་གྱི་ཁམས་བརླག་པར་གཟིགས་ནས། དེ་དག་འདུལ་བའི་ཕྱིར་འོག་མིན་ནས་རི་རབ་ཀྱི་རྩེ་མོར་བྱོན་སྟེ་(ཏེ)། རིགས་ལྔའི་དེ་བཞིན་
གཤེགས་པ་རྣམས་ལ། དཔལ་རྣམ་པར་སྣང་མཛད་ཀྱི་གཞལ་ཡས་ཁང་པར་སྤྲུལ། འོད་དཔག་མེད་ཀྱི་སྐུ་རུ་མཛད། རིན་ཆེན་འབྱུང་ལྡན་གྱི་གཙུག་ཏོར་དུ་བརྒྱན། དོན་ཡོད་གྲུབ་པས་དལ་གྱི་ལྷ་ཚོགས་སུ་སྤྲུལ།
མི་བསྐྱོད་པས་གོ་ཆའི་ལྷར་མཛད་ནས། དེའང་། སྐུ་བཞི་ལས་ལོངས་སྐུ་དཔལ་རྡོ་རྗེ་འཆང་གི་ངོ་བོ། ཞལ་གཅིག་ཕྱག་གཉིས་པ། ཡུམ་ཀུན་ཏུ་བཟང་མོ་དང་མཉམ་པར་སྦྱོར་བ། སྐུ་མདོག་དཀར་པོ་གཅིག་ཏུ་སྤྲུལ་
1-7-3a

སྟེ། དེ་ལས་འབྲས་བུའི་ཧེ་རུ་ཀ་སྐུ་མདོག་ནག་པོ་ཞལ་བཞི་ཕྱག་བཅུ་གཉིས་པ། ཡུམ་རྡོ་རྗེ་ཕག་མོ་དང་མཁྱུད་(འཁྱུད་)པར་སྤྲུལ་ནས། སྐུ་གསུང་ཐུགས་ཀྱིས་དཔའ་བོ་ཉི་ཤུ་རྩ་བཞི་དང་། དཔའ་
མོ་ཉི་ཤུ་སྤྲུལ་ནས། དེའང་སྐུའི་མཛད་པས་དྲག་པོ་ཉེར་བཞི་བརྟུལ་ཞིང་། དེའང་མཛད་པ་གསུམ་སྟེ། ལོངས་སྤྱོད་པ་དང་། ཐིམ་པ་དང་། དབང་དུ་བྱས་པའོ། །ལོངས་སྤྱོད་པ་ནི་གཉིས་ལས། བཙུན་མོའི་ཚོགས་
རྣམས་ཧེ་རུ་ཀས་ཕྲོགས་ཤིང་སྤྱད་པ་ནི། ཚོགས་ཀྱི་འཁོར་ལོ་ལ་ལོངས་སྤྱད་པ་ཡིན་ལ། རུས་པའི་བརྒྱན་(རྒྱན་)ཆ་རྣམས་ཀྱང་རང་ལ་བརྒྱན་པ་ནི། བརྒྱན་(རྒྱན་)ལ་ལོངས་སྤྱོད་པའོ། །ཐིམ་པ་ལ་ཡང་གཉིས་སྟེ། སྲོག་ཐིམ་
ནས་ནི། ཕོ་རྣམས་བསད་ནས་རྣམ་པར་ཤེས་པ་བསྒྱུར་བའོ། །ཡེ་ཤེས་ཐིམ་པ་ནི་མ་ཧཱ་དེ་བ་ཐལ་བའི་དབང་པོར་གྱུར་ལ། དྲག་པོ་ཉེར་བཞི་བསད་ནས་དཔའ་བོ་ཉེར་བཞིའི་ཡེ་ཤེས་དང་བསྲེས་ལ། མོ་རྣམས་བསད་
ཅིང་རྣམ་པར་ཤེས་པ་རྣམས་རྣལ་འབྱོར་མ་རྣམས་དང་གཉིས་སུ་མེད་པར་བྱས་པའོ། །འཇིགས་བྱེད་ཉེར་བཞི་ནི་དཔའ་བོ་ཉེར་བཞི་གདན་དུ་བྱ་བའོ། །ངག་དབང་དུ་བྱ་བ་ནི། དེ་དག་གི་ངག་རེངས་པར་བྱས་ལ། ཡིད་དབང་
དུ་བྱས་པ་ནི་ཐམས་ཅད་ཀྱི་ཡིད་རྒྱལ་དུ་བཅུག་པའོ། །དེ་ལྟར་ཕོ་རྣམས་ནི་ཞེ་སྡང་གི་ཚུལ་གྱིས་བརྟུལ་(བཏུལ་)ཞིང་། མོ་རྣམས་ནི་ཆགས་པའི་ཚུལ་གྱིས་བརྟུལ་(བཏུལ་)ལོ། །དེ་དག་གི་ཕྱོགས་སུ་རྟོགས་(གཏོགས་)པའི་མིའམ་ཅི་ཕོ་འདུལ་བའི་དོན་དུ་
1-7-3b

སྒོམ་བཞི་ལ། མིའམ་ཅི་མོ་འདུལ་བ་ནི། འཚམས་(མཚམས་)བཞིར་སྣང་བའོ། །དེ་ལྟར་འདུལ་(གདུལ་)བྱ་རྣམས་བརྟུལ་(བཏུལ་)ནས། གནས་ཉི་ཤུ་རྩ་བཞིར་དཔའ་བོ་ཉེར་བཞི་དང་། དཔའ་མོ་ཉེར་བཞི་རྣམས་སྤྲུལ་པ་མ་རྟོགས་(གཏོགས་)པར་
ད་ལྟར་བཞུགས་སོ། །དེ་ནས་རི་རབ་ཀྱི་རྩེར་བྱོན་ནས་དཔའ་མོ་དང་རྣལ་འབྱོར་མ་རྣམས་ཀྱིས་གསོལ་བ་བཏབ་པའི་ངོར། ཐོག་མར་བརྒྱུད་(རྒྱུད་)ལེའུ་འབུམ་པ་གསུངས་སོ། །དེ་ནས་ཡང་མངས་པར་གཟིགས་ནས། ཡང་མཆོད་པ་
ཕུལ་ནས་ཞུས་པས། ཁ་བ་མ་ཡང་ཅེས་པ་ཤཽ་(ཤཽླ་)ཀ་འབུམ་པ་གསུངས་སོ། །དེ་ནས་ཡང་ནང་གི་མཆོད་པ་དང་། བསྟོད་པ་ཕུལ་ནས་ཞུས་པས། མཁའ་འགྲོ་དྲ་བ་སྡོམ་པ་རྒྱ་མཚོའི་རྒྱུད་ཚིག་རྐང་པ་འབུམ་གསུངས་སོ། །
དེ་ནས་ཡང་མཆོད་པ་སྣ་ཚོགས་ཕུལ་ནས་ཞུས་པས། ལེའུ་ལྔ་བཅུ་རྩ་གཅིག་པ་ཡི་གེ་འབུམ་པ་གསུངས་སོ།། །།དེ་ནས་བཤད་པའི་རྒྱུད་རྣམས་གསུངས་སོ། །དཔལ་
བདེ་མཆོག་གི་བྱུང་ཚུལ།
༄། །ཡུལ་ཉི་ཤུ་རྩ་བཞིའི་རྒྱུ་མཚན་བསྟན་པ།
༄༅། །ན་མོ་ཤྲི་(ཤྲཱི་)ཧེ་རུ་ཀ་ཡེ། དེ་ལ་པུ་ཞེས་བྱ་བ་ནི་པུ་ལི་ར་མ་ལ་སྟེ། ཕྱི་འཛམྦུའི་གླིང་གི་རི་མ་ལ་ཡའོ། །དེའི་རྐེད་པ་ན་འཆར་བ་ཅན་ཞེས་པའམ། དྲི་ཆེན་པོ་ཅན་ཞེས་བྱ་བར་ཡང་འགྲོ་སྟེ། དེ་ཙན་(དན་)
1-7-4a

གྱི་དྲི་ངད་ལྡང་བའི་རི་བོ། དེ་ཡང་ནང་ལུས་ཀྱི་དལ་ལྟར་ན། མགོ་བོའི་རྐེད་ནས་མིག་འཆར་བ་ཡིན་ཞིང་། ཇི་ལྟར་ཙན་དན་གྱི་ཐང་ཆུ་ལ་ག་བུར་གྱི་དྲི་མནམ་པ་ལྟར། ལུས་ཀྱི་གནས་དེ་ཉིད་ན་
བྱང་སེམས་ཀྱིས་དྲི་བཞི་མཉམ་ལྟ་བུའང་གནས་པའོ། །ཛ་ལན་དྷ་ར་ཞེས་འབར་བ་འཛིན་པ་སྟེ། ཕྱི་ལྟར་ཐོ་ལིང་གི་གཙང་པོ་ཤ་པ་རུ་པ་བྱ་བ་དང་། གར་ཞིའི་གཙང་པོ་བྱི་བ་ཤ་ཞེས་པ་དང་། ཤི་ཀའི་གཙང་པོ་མེར་བ་
ཤེས་(ཞེས་)པ་དང་གསུམ་འདོམ་པའི་མདོ་ན་གྲོང་ཁྱེར་ཆེན་པོ་གཅིག་ཡོད་དེ། དེ་ལས་རྒྱང་གྲགས་ཅིག་གི་ཕ་རོལ་ན་སྔོན་གྱི་བསྒྲུབ་(སྒྲུབ་)གནས་བྲག་ཕུག་བརྒྱད་ཅུ། ཆུ་མིག་བརྒྱད་ཅུ། ཤིང་དྲུང་བརྒྱད་ཅུ་ཡོད་ལ། དེའི་ཐད་ཀའི་བྲག་
གི་དབུས་ན་ཆུ་འབབ་པའི་སྟེགས་ལ། མུ་སྟེགས་པ་དང་ཡུལ་ཤ་ཀི་བ་ཁྲུས་བྱེད་པ་སྟེ། ཡུལ་དེ་ལ་འབར་བ་འཛིན་པ་ཅེས་(ཞེས་)པར་གྲགས་སོ། །ནང་ལྟར་ན་སྤྱི་གཙུག་ཚངས་ཕུག་ཀྱང་དྲོད་རྣམས་རྒྱུ་ཞིང་འབར་བའོ། །དབུ་ཨུ་རྒྱན་
ཞེས་ཐོད་པ་འཛིན་པ་སྟེ། ནུབ་ཕྱོགས་མཁའ་འགྲོ་རྣམས་ཀྱི་བྱིན་གྱིས་བརླབས་པའི་གནས་སྟེ(ཏེ)། སའི་དབྱིབས་ཆོས་འབྱུང་ལྟར་གནས་ཞིང་(ཤིང་)། དེ་ན་གནས་པའི་མི་རྣམས་ཀྱང་ཤེས་རབ་ཆེ་བའོ། །ནང་ལྟར་ན་རྣ་བ་གཡས་
པ་སྟེ། དེས་ཐོས་པ་འཛིན་པའོ། །ཨརྦུ་ཏ་ནི་རྡོ་འཇོག་ཅེས་བྱ་སྟེ། གྲོང་ཁྱེར་རྡོ་འཇོག་ཅེས་བྱ་བ་ནི། རི་དབུས་མཐོ་ལ་མཐའ་གཞོལ་བ། འབྲང་རྒྱས་ལྟ་བུ་ན་ལ་ནགས་ཚལ་འཐུག་པོ་ཡོད་པ། ཕྱུགས་རྫི་ལ་སོགས་པའི་མི་
1-7-4b

རྒྱུ་ཞིང་ཉམས་དགའ་བའི་གནས་སོ། །དེ་ལ་རྡོ་རྗེ་བརྩེགས་པ་ཅན་ཞེས་གྲགས་སོ། །ནང་ལྟར་ན་ལྟག་པའང་རྒལ་ཚིགས་ཀྱི་སྟེང་ན་རྡོ་བརྩེགས་པ་ལྟར་གནས་པའོ། །དེ་དག་ཏུ་མཁའ་འགྲོ་མ་རྣམས་རྒྱུན་ཏུ་(དུ་)ཚོགས་པའི་གནས་
ཡིན་པས་ན་ཞི་གནས་ཞེས་བྱའོ། །ནང་ལྟར་ན་བདེ་སྟོང་ཉམས་ཀྱིས་བརྟེན་བྱང་སེམས་རྒྱུན་ཏུ་(དུ་)གནས་པས་ནའོ། །གོ་ཏ་ཝ་རི་ཞེས་ཐོས་འཛིན་གྱི་ཁྱད་པར་རོ། །དེའང་བའི་མཆོག་སྦྱིན་ཅེས་པ་སྟེ། བལ་པོ་ཅིག་གི་བ་ཅིག་ཡོད་
ལ། དེ་རི་ལ་བཏང་བས་ནུ་མ་སྟོང་བར་བྱུང་སྟེ་བལྟས་པས་ས་སྐྱོངས་(སྐྱོང་)ཅིག་ལ་འཁོར་ཡུལ་ཅིག་འོ་མས་གསང་ནས་གནང་སྟེ། དེ་བརྐོས་པས་རྡོ་ལས་གྲུབ་པའི་མ་ཧཱ་དེ་བའི་ལིང་ཁ་(ག་)ཅིག་བྱུང་སྟེ། དེའི་ཤར་ཕྱོགས་ན་ཆུ་འབབ་ལ།
དེའང་བརྒལ་བ་ན་འབིགས་བྱེད་ཅེས་བྱ་བའི་རི། ནགས་ཚལ་དང་མེ་ཏོག་ཏུ་ལྡན་པ་ཉམས་དགའ་བའི་ས་ཕྱོགས་ཅིག་ན། བའི་མཆོག་སྦྱིན་བྱས་པའི་མཚམས་སུ་བརྐོས་པས་རྡོ་ནག་པོ་ཟོ་ཟོ་བ་ཅིག་ལ་ཆོས་འབྱུང་གི་རྣམ་
པ་བྱང་སེམས་ཀྱིས་གང་བ་ཅིག་སྣང་སྟེ། དེ་ལྟ་བུའི་གནས་སོ། །ནང་ལྟར་ན་མཆོག་སྦྱིན་ལྟར་རྣ་བ་ནས་ཀྱང་རྣ་ལྤགས་འཛག་པས་རྣ་བ་གཡོན་པའོ། །ར་མེ་ཤྭ་ར་ཞེས་པ་ནི། དེའང་དགའ་བའི་ནགས་ཚལ་ཞེས་པ་སྟེ། དེའང་
རྡོ་རྗེ་གདན་གྱི་ཤར་ཕྱོགས། རྒྱལ་པོ་དགའ་བྱེད་དབང་ཕྱུག་གི་གྲོང་ན་སྔོན་གྱི་བསྒྲུབ་(སྒྲུབ་)གནས་བྲག་རྟའི་རྔོག་མ་འདྲ་བ་ཅིག་ཡོད་ལ། དེ་ལ་ནགས་ཀྱི་འཚམས་(མཚམས་)ཞེས་གྲགས་སོ། །ནང་ལྟར་ན་སྨིན་མ་མཚམས་དང་ཆོས་
1-7-5a

འཐུན་པའོ། །དེ་བ་ཀོ་ཊ་ཞེས་ལྷ་མོའི་མཁར་སྟེ། ཤར་ཕྱོགས་བྷ་རེན་ཏྲའི་གྲོང་ཁྱེར་པཉྩ་པ་ཏ་ན་རྒྱང་གྲགས་བཞིའི་ཕ་རོལ་ན། རྒྱལ་པོ་དེ་སོ་པ་ལཱི་ལྷ་ཁང་ན་ལྷ་བརྟེན་(རྟེན་)མིག་ལྟ་བུ་གཉིས་ཡོད་
ལ། དེ་ལ་ལྷ་མོ་མཁར་ཞེས་ཨུ་དེ་མ་(ཨུ་མ་)དེ་བའི་བརྟེན་(རྟེན་)དེ་ལ་གཞན་གྱིས་གཟུགས་བརྙན་འཆར་རོ། །ནང་ལྟར་ན་མིག་གཉིས་ལ་གཞན་གྱིས་གཟུགས་བརྙན་འཆར་རོ། །མ་ལ་ཝེ་ཞེས་ཕྲེང་བ་འཛིན་པ་སྟེ། ཡུལ་དེ་
ན་བསྒྲུབ་(སྒྲུབ་)གནས་གཡས་གཡོན་དམའ་ཞིང་དབུས་མཐོ་བ་ཕྲེང་བ་ལྟ་བུ་ཅིག་ཡོད། དེ་ན་རྡོའི་ཆོས་འབྱུང་བསྒྲུབ་(སྒྲུབ་)པ་པོས་རེས་མཐོང་རེས་མི་མཐོང་བ་ཅིག་ཡོད་ལ། དེ་ལ་ཕྲེང་བ་འཛིན་པ་ཞེས་གྲགས་སོ། །ནང་ལྟར་ན།
ལག་སོར་ཕྲེང་བ་ལྟ་བུ་དཔུངས་(དཔུང་)ལ་བརྟེན་པའོ། །དེ་དག་ལ་ཉེ་བའི་གནས་ཞེས་པ་ནི། མཁའ་འགྲོ་སོགས་རེ་འགའ་ཙམ་གནས་ཤིང་རྒྱུན་ཏུ་(དུ་)མི་གནས་པའོ། །ཐུགས་ཀྱི་འཁོར་ལོ་ནམ་མཁའ་ལ་རྒྱུ་བའི་གདུལ་བྱ་
རྗེས་སུ་འཛིན་པས་མཁའ་ལ་སྤྱོད་པའོ། །ཀ་མ་རུ་པར་ནི་དྲོད་(འདོད་)ལྡན་ཞེས་པ་སྟེ། ཤར་ཕྱོགས་ན་ལྷ་བརྟེན་(རྟེན་)འཆན་(མཆན་)ཁུང་ལྟ་བུ་ཅིག་ན་རྡོའི་ཆོས་འབྱུང་ལས་དག་པས་མཐོང་བ་ཅིག་ཡོད་ལ། མིང་ནི་འདོད་གཟུགས་
ཅེས་སོ། །ནང་ལྟར་ན་འཆན་(མཆན་)ཁུང་ཡང་རྡོ་བསོ། ཨྜོ་ནི། བསོ་(གསོ་)བྱེད་དེ། ལྷོ་ཕྱོགས་ཀྱི་རྒྱལ་པོ་ཤིང་རྟ་བཅུ་པའི་གནས་ན། བསྒྲུབ་(སྒྲུབ་)གནས་ན། ལྷ་བརྟེན་(རྟེན་)རོའི་ལིང་ཁ་(ག་)ནུ་མ་ལྟ་བུ་ཅིག་(ཞིག་)ཡོད་པས། དེ་ལ་བསོ་བྱེད་ཅེས་
1-7-5b

གྲགས་ཤིང་། ཡུལ་དེ་ཡོ་བྱད་ཤིན་ཏུ་མང་ངོ་། །ནང་ལྟར་ན་ནུ་མས་ཀྱང་གཞན་བསོ་(གསོ་)ཞིང་མི་མཛད་(འཛད་)པའོ། །ཞིང་ཞེས་དཔའ་བོ་དང་རྣལ་འབྱོར་མ་རྒྱུན་ཏུ་(དུ་)འཚོགས་པའོ། །ཏྲི་ཤ་ཀུ་ཎ་ཞེས་གསུམ་འདུས་ཅེས་(ཞེས་)པ་
སྟེ། ཏུ་རུ་ཀའི་ཡུལ་ན་ཆུ་བོ་གངྒཱ་དང་། བཀྴུ་དང་། སིན་དྷུ་གསུམ་འདུས་པའི་ས་ན་རྡོའི་ཆོས་འབྱུང་ལྟ་བུ་ཅིག་ཡོད་ལ། དེ་ལ་བྱ་ངང་པ་དང་། ཀྲུང་(ཁྲུང་)ཁྲུང་དང་། ས་ར་ས་དང་། བཞད་པ་དང་། ནེ་ཙོ་ལ་སོགས་པ་མང་པོ་
སྐད་སྙན་པ་སྒྲོགས་ཅིང་(ཤིང་)ཉམས་པ་གཅིག་ཡོད་ལ། མིང་ནི་གསུམ་འདུས་ཅེས་གྲགས་སོ། །ནང་ལྟར་ན། ལྟེ་བར་རྩ་གསུམ་འདུས་པས་སོ། །ཀོ་ས་ལ་ནི་ནུབ་ཕྱོགས་རྒྱལ་པོ་སངས་རྒྱས་ཀྱིས་རྒྱལ་ཁམས་ནས་རྒྱང་གྲགས་
ཅིག་ན་བསྒྲུབ་(སྒྲུབ་)གནས་ན་སྣ་ལྟ་བུའི་ལིང་ཁ་(ག་)གཅིག་ཡོད་དེ། དེ་ལ་མི་རྒྱུད་བྱེད་ཅེས་སོ། །ནང་ལྟར་ན་སྣ་རྩེར་སེམས་རྒྱུད་པའོ། །རེས་འགའ་ཚོགས་པས་ཉེ་བའི་ཞིང་ངོ་། །ཀ་ལིང་ཀ་ནི་ཟད་བྱེད་ཅེས་སྟེ(ཏེ)། རྡོ་རྗེ་གདན་ནས་
དཔག་ཚད་བཅུ་གཉིས་ཀྱི་ཕ་རོལ་ན་ཡུལ་གླང་པོས་འཛིན་ཅེས་བྱ་བ་ནི། ཁ་ལྟ་བུའི་བསྒྲུབ་(སྒྲུབ་)གནས་སྤང་དང་ནགས་ཀྱི་མཚམས་ལེགས་པོ་ཅིག་ཡོད་ལ། དེ་ནི་ཟད་བྱེད་ཅེས་སོ། །ཡུལ་དེར་ཡི་དགས་མང་བས་
རོ་བསྐྱལ་བ་ཙམ་གྱིས་མེད་པར་བྱེད་དོ། །ནང་ལྟར་ན་ཁས་ཀྱང་ཟས་མྱུར་དུ་མེད་(མིད་)པར་བྱེད་པས་ནའོ། །ལཾ་པ་ཀ་ནི། འཕྱང་བ་ཅན་ཞེས་ཏེ། གར་ལོག་གི་རྒྱབ་ན་བསྒྲུབ་(སྒྲུབ་)གནས་བྲག་དང་ཆུ་འཐབ་པ་སྟེ། དེ་ན་རྡོའི་ལིང་
1-7-6a

ཁ་(ག་)སྐྱེ་འགྲིན་(མགྲིན་)ལྟ་བུ་ཅིག་ཡོད་དོ། །དིང་སང་འཇིག་རྟེན་གྱི་མཁའ་འགྲོས་བཟུང་བས་མི་མ་ཡིན་གནས་སོ། །དེར་བྲག་ཅིག་འཕྱང་བ་ལྟར་འདུག །འཕྱང་བ་ཅན་ཞེས་བྱའོ། །ནང་ལྟར་ན་མགྲིན་པའི་
ལྐོག་ན་གློ་སྙིང་འཕྱང་བའོ། །ཙྪནྡྷོ་ཧ་ནི་ཕན་འདོགས་དང་ཚར་གཅོད་ལ་འདུན་པས་ནའོ། །ནང་ལུས་ཀྱི་འང་དེ་དག་ནས་བྱང་སེམས་ཀྱི་ཚར་གཅོད་དང་ཕན་འདོགས་བྱེད་པའོ། །ཀཉྩི་ནི་གསལ་ལ་འཛིན་པ་སྟེ། ཏུ་
རུ་ཀའི་ཡུལ་ནས་དཔག་ཚད་བཅུ་གཉིས་པའི་གྲོང་ཁྱེར་ཆེན་པོ་ཅིག་ཡོད་ལ། དེའི་དབུས་སུ་རྡོའི་ལིང་ཁ་(ག་)སྙིང་ལྟ་བུ་ཅིག་ཡོད་དེ། མིང་གསལ་བ་འཛིན་ཅེས་སོ། །གནས་དེར་གནས་པ་རྣམས་ཤེས་རབ་གསལ་སྐད།
ནང་ལྟར་ན་སྙིང་ཡང་དྲོན་གསལ་བའོ། །ཧི་མ་ལ་ཡ་ཞེས་ཁ་བ་ཅན་ནོ། །དེ་ནི་གངས་ཏེ་སེ་ཏེ། རྡོ་མཚན་མ་མི་ཙམ་ལ་ཆུ་འབབ་པའོ། །དེར་ཁ་བ་འབབ་པས་ན་ཁ་བ་ཅན་ཞེས་སོ། །ནང་ལྟར་ནི། འདོམས་ཏེ། དེར་ཀྱང་དྲི་ཆུ་
འབབས་པས་ནའོ། །ཉེ་བའི་ཚན་དྷོ་ཧ་ནི། རེས་འགའ་ཚར་གཅོད་རྗེས་བཟུང་བྱེད་པས་ནའོ། །ནང་དུའང་། དེ་དང་མཚུངས་པའོ། །གསུང་གི་འཁོར་ལོས་མི་ལ་སོགས་པའི་ས་ལ་གནས་པའི་རྣམས་རྗེས་སུ་འཛིན་པས་ན་
ས་ལ་སྤྱོད་པའོ། །པྲེ་ཏ་པུ་ར་ནི་ཡི་དགས་གྲོང་ངམ་འདོད་པ་ཅན་ནོ། །དེ་རྒྱ་བོད་ཀྱི་མཚམས་ན། བསྒྲུབ་(སྒྲུབ་)གནས་ངམ་གྲོག་དང་། གཅོང་རོང་དང་། འབར་འབུར་གྱིས་(གྱི་)དབུས་ན། རྡོའི་ལིང་ཁ་(ལིངྒ་)མཚན་མ་ལྟ་བུ་ཅིག་
1-7-6b

ཡོད་དེ། དེ་ཡི་དགས་ཀྱི་གནས་བྱ་བ་ཅིག་ཡིན་ལ། དེར་གནས་པ་རྣམས་ཟས་སྐོམ་གྱིས་གསུང་(གསུས་)གདུངས་པའོ། །ནང་དོན་མཚན་མ་སྟེ། འདོད་ཆགས་ཀྱིས་བརྡུངས་པའོ། །གྷྲི་ཧ་དེ་བ་ཏེ། ཞེས་ལྷའི་ཁྱིམ་
ཅན་ཅེས་(ཞེས་)སོ། །ལི་ཡུལ་གྱི་ལྕང་ར་རྨུག་(སྨུག་)པོ་ན། བསྒྲུབ་(སྒྲུབ་)གནས་རྡོའི་ལིང་ཁ་(ག་)དཔལ་བཤོས་ལྟ་བུས་མཚན་པ་ཅིག་ཡོད་ལ། དེ་ལྟའི་ཁྱིམ་ཞེས་གྲགས་སོ། །ནང་ལྟར་ན། གཤང་(བཤང་)ལམ་ཡང་རྣམ་སྣང་གི་
གནས་ཡིན་པས་དེ་སྐད་ཅེས་བྱའོ། །འདུ་བ་ཅན་ཞེས་དཔའ་བོ་དང་རྣལ་འབྱོར་མ་ཀུན་ག་ན་ཙཀྲ་ལ་རྒྱུན་ཏུ་(དུ་)འདུ་བས་ནའོ། །སཽ་རཥྚ་ཞེས་པ་འཁྲང་བྱེད་མ་སྟེ། ཏུ་ཏུ་(རུ་)ཀའི་ཡུལ་ན་གྲོང་ཁྱེར་བུ་མུ་བྱ་བ་ཅིག་ཡོད། ཁ་
ཅིག་ནི་བ་ར་ཎ་སེ་(ཝཱ་རཱ་ཎ་སཱི་)ཡིན་པར་འདོད། བསྒྲུབ་(སྒྲུབ་)གནས་དེ་ན་བརླ་ལྟ་བུའི་ལིང་ཁ་(ག་)ཅིག་ཡོད་ལ། མིང་ནི་བཟང་པོའི་འཁྲང་བྱེད་ཅེས་བྱ་སྟེ། ཡུལ་དེའི་ས་དང་བྲག་འཁྲང་ཞིང་བཟང་བས་ནའོ། །ནང་ལྟར་རྐེ་ན་རྐེད་པའང་འཁྲང་
ཞིང་བརྟན་པར་བྱེད་པས་ན་བརླའི་རྩའོ། །སུ་ཝ་རྞ་དཱི་ཝ་(དྭིཔ་)ཞེས་གསེར་གྱི་གླིང་ངོ་། །དེ་ནི་རྒྱ་གར་ནུབ་ཕྱོགས་ཀྱི་རྒྱ་མཚོའི་རོལ་གསེར་གྱི་གླིང་ཞེས་སྟེ(ཏེ)། ཁ་ཅིག་ནི། རྒྱལ་པོ་དཔལ་ལྡན་གཙུག་གི་ནོར་བུའི་ཡུལ་རྒྱ་ནག་སྟོང་
ཀུན་ཡིན་པས་དེ་དང་ཉེ་བ་ན་བསྒྲུབ་(སྒྲུབ་)གནས་ཀྱི་ལིང་ཁ་(ག་)བྱིན་པ་ལྟ་བུ་ཅིག་ཡོད་དེ་ན་རང་(རོང་)མང་ཞིང་འཕེལ་བའོ། །ནང་ལྟར་ན་བྱིན་པས་ཀྱང་ལུས་ཀྱི་ཚིལ་བསྐྱེད་པའོ། །ཉེ་བའི་འདུ་བ་ཅན་ནི་ཚོགས་ལ་རེས་འགའ་ཙམ་འདུ་
1-7-7a

བའོ། །ན་ག་ར་ཞེས་མགོ་བརྒྱན་ཅེས་(ཞེས་)སོ། །དེ་ན་སྲིན་ཡུལ་ལང་ཀ་པུ་ར་སྟེ། བསྒྲུབ་(སྒྲུབ་)གནས་མཚོའི་དོ་ཅིག་ལ་རྡོའི་ལིང་ཀ་རྐང་སོར་ལྟ་བུ་ཅིག་ཡོད་དོ། །ཁ་ཅིག་ནི། ཁ་ཆེ་དང་རྒྱ་གར་ནུབ་བྱང་མཚམས་
ན་གླིང་ཅིག་ཡོད་པས་དེ་ཡུལ་པུ་ར་བྱ་བ་ཡིན་ཟེར་རོ། །མིང་ནི་ཀླུའི་མགོ་བརྒྱན་ཞེས་སོ། །ནང་ལྟར་ན་རྐང་སོར་རྣམས་ཀྱང་སྦྲུལ་མགོ་ལྟར་རྐང་མགོས་བརྒྱན་པའོ། །སིན་དྷུ་ཞེས་བརླག་བྱེད་དེ། ཛཱ་ལན་དྷ་ར་དང་། ཀ་
ཏུ་རུ་ཀའི་བར་ན་ཡོད་དེ། དེའང་ཛཱ་ལན་དྷ་ར་ཉེ་བ་ན་ཆུ་བོ་སིན་དྷུའི་འགྲམ་ན་བསྒྲུབ་(སྒྲུབ་)གནས་རྡོའི་ལིང་ག་རྐང་བོལ་ལྟ་བུ་ཅིག་ཡོད་དེ། མིང་ནི་བརླག་བྱེད་ཅེས། ནང་ལྟར་ན་རྐང་པའི་བོལ་དུ་བྱང་སེམས་བརླག་པར་འགྱུར་
བས་ནའོ། །དུར་ཁྲོད་ནི། དཔའ་བོ་དང་རྣལ་འབྱོར་མས་མ་རུངས་པ་ཚར་གཅོད་པའི་ཕྲིན་ལས་མཛད་པས་ནའོ། །མ་རུ་ཞེས་ཆུ་མི་འབབ་པ་སྟེ། ཛཱ་ལན་དྷ་རའི་བྱང་ཕྱོགས་ན། བྲག་ཕུག་བསྒྲུབ་(སྒྲུབ་)པ་པོ་བརྒྱ་རྩ་བརྒྱད་ཤིང་(ཤོང་)
པ་ཅིག་ཡོད་ལ། དེ་ན་རྡོའི་ལིང་ག་རྐང་འཐེབ་ལྟ་བུ་ཅིག་ཡོད་དེ། གནས་དེར་མས་ཡར་ནི་མི་ཐར་ལ། ཡས་མར་སྤྱང་ཐག་འདོམ་བཅུ་གཉིས་ཙམ་གྱིས་སློབ་པ་ལ་འདོམ་དེ་ཙམ་ཆད་ནས་བསྒྲུབ་(སྒྲུབ་)པ་པོ་གཏོང་བའོ། །དེ་ལ་མིང་
ནི་དྲོད་མེད་མ། ནུས་ཆུ་ཞེས་བྱའོ། །ནང་ལྟར་ན་རྐང་འཐེབ་ཀྱང་དྲོད་ཆུང་ཞིང་། བྱང་སེམས་ཀྱི་ནུས་པ་ཞན་པས་ནའོ། །ཀུ་ལུ་ཏ་ཞེས་འབྱར་བ་ཅན་ཏེ། དེ་ནི་གར་ཞའི་ཡུལ་གྱིས་(གྱི་)རྒྱབ། ཉུང་ཏི་བྱ་བའི་ཡུལ་གྱི་ཕུག་ན། 
1-7-7b

བསྒྲུབ་(སྒྲུབ་)གནས་སུ་ལིང་ག །པུས་མོ་ལྟ་བུ་མཚན་པ་གཅིག་ཡོད་དེ། ཐུར་དུ་བརྐོས་པས་ཆོས་འབྱུང་ཅིག་ཀྱང་ཡོད་སྐད། དེའི་མིང་ནི་འབྱར་བ་ཅན་ཞེས་བྱ་སྟེ། ཡུལ་དེའི་རི་བྲག་རྣམས་ཅིག་(གཅིག་)ལ་ཅིག་(གཅིག་བསྙེས་)མཉེས་ཤིང་
འབྱར་བའི་ཚུལ་དུ་ཡོད་པའོ། །ནང་ལྟར་ན། རྐང་པའི་པུས་མོ་གཉིས་ཀྱི་ལྷ་ང་འབྱར་བའམ། བརླ་དང་བྱིན་པ་འབྱར་བའི་རྩེ་ན་པུས་མོ་ཡོད་པས་ན་དེ་སྐད་ཅེས་བྱའོ། །ཉེ་བའི་དུར་ཁྲོད་ཅེས་ཚར་གཅོད་ཀྱི་
ལས་རེ་འགའ་བྱེད་ཅིང་། གཙོ་བོར་བྱེད་པ་མ་ཡིན་པས་ནའོ། །སྐུའི་འཁོར་ལོས་ངན་སོང་ལ་སོགས་པའི་ས་འོག་གི་འགྲོ་བ་རྣམས་འདུལ་བས་ན། ས་འོག་སྤྱོད་ཅེས་གྲགས་སོ། །དཔལ་འཁོར་ལོ་བདེ་མཆོག་
གི་རྣམ་པར་འཕྲུལ་པ་དང་། ཡུལ་ཉི་ཤུ་རྩ་བཞིའི་རྒྱུ་མཚན་བསྟན་པ། ན་(ནཱ་)རོ་པཎ་ཆེན་གྱིས་ཞལ་མངའ་(སྔ་)ནས་གསུངས་པ། མར་པས་བསྒྱུར་བའོ།། །།


目錄
དཔལ་འཁོར་ལོ་བདེ་མཆོག་གི་རྣམ་པར་སྤྲུལ་པ་དང་། ཡུལ་ཉི་ཤུ་རྩ་བཞིའི་རྒྱུ་མཚན་བཞུགས་སོ། །
ལེའུ་ལྔ་བཅུ་རྩ་གཅིག་པ་ཡི་གེ་འབུམ་པ།
ཡུལ་ཉི་ཤུ་རྩ་བཞིའི་རྒྱུ་མཚན་བསྟན་པ།